3. ARIKETA: HEZKUNTZA-SISTEMAKO LEGEAK (LGE, LOGSE, LOCE, LOE)

HAUSNARKETA

Hirugarren jarduera honetan, hezkuntza-sistema arautu izan duten legeak aztertu ditugu: LGE (1970), LOGSE (1990), LOCE (2002) eta, azkenik, LOE (2006).

Legeen arteko konparaketa egiteko, hainbat irizpide izan ditugu kontutan: hezkuntzaren antolamendua (zikloak, adin-tarteak…), edukien planteamendua eta erredakzioa, rol bakoitzaren betebeharrak (irakasle, ikasle…), IKTez egiten duten aipamena eta azkenik, legea indarrean egon zen garaiko testuinguru sozio-politikoa.

Legeak indibidualki hartuta, ezberdintasunak somatu ditugu. Alde batetik, LGE eta LOGSE legeak klasean gehiago landu ditugu eta horrek erraztu egin digu informazioa jasotzea eta irizpideak alderatzea. Aldiz, LOCE eta LOE legeen inguruko informazioa Internet bidez lortu behar izan dugu. LGE eta LOGSE legeen adibide bana landu dugu klasean eta LOCE eta LOE legeen adibiderik ez dugu izan. Ondorioz, lehen bien azterketa zehatzagoa eta sakonagoa egin dugula iruditu zaigu (irakaslearen rola nolakoa den, edukiak planteatzeko modua...).

Bestetik, LGE legetik LOGSE legerako aldaketa askoz nabariagoa izan da, LOGSE legetik LOCE edota LOE legeetara baino: ikasketa adina luzatzea, edukien planteamenduaren aldaketa (kontzeptuak, prozedurak eta jarrerak) edota ikasketa ibilbidean aukera gehiago izatea. Horren ondorioz, alderaketa egitea askoz ere errazagoa suertatu zaigu, ebidenteagoa zelako alde hori. Aldiz, LOCE eta LOErako aldaketak murritzagoak dira ez dira hain begi-bistakoak.

Ariketa hau egiten sortu zaizkigun arazoei dagokienez, hasieran sortu zitzaigun lehena. Izan ere, legeak konparatzerako orduan ez geneukan oso argi ariketa nondik heldu eta zein irizpide erabili konparaketa egiterako orduan. Adinaren eta edukien planteamenduaren alderaketa bai, baina hortik aurrerako irizpideak topatzea zaila egin zaigu. Bestetik, informazio baliagarria aurkitzeko arazoak izan ditugu ere, edukia topatu bai baina bertan adierazitakoa sailkatzeko zalantzak izan ditugu (zer da garrantzitsua? Zein informazio da ariketarako erabili behar duguna?).

Legeen inguruan informazio asko ez izanak agian baldintzatu gaitu oraingo ariketan. Garrantzitsutzat jotzen dugu hezkuntza arautu izan duten legeak ezagutzea eta aztertzea baina gaia asko menderatzen ez dugunez, ez dugu ariketa behar bezala baloratu eta astuna egin zaigu aurrera eramatea.