IRAKASGAIAREN INGURUKO HAUSNARKETA OROKORRA

Hasteko, onartu behar dugu ez garela oso iaioak teknologia berrien munduan. Unibertso arrotza da guretzat. Halere, tresna erabilgarritzat jotzen ditugu gaur egungo gizartean eta gainera, Bigarren Hezkuntzan aritzeko potentzial handia dute. Gazteak teknologia berrien gizartean jaio dira eta horretara ohituta daudenez gero, irakasleek ere behar berri horietara moldatzeko obligazio profesionala dute.

Bestalde, teknologia berrien erabilpena pizgarri garrantzitsua izan daiteke nerabeentzat: Mobilak, ordenagailuak… beraien egunerokotasunaren parte dira. Horrela, esaterako, nerabe bati nekezagoa egingo zaio anatomiako liburu mardul baten irakurketa ordenagailu baten aurrean joko didaktiko batekin esperimentatzea baino.

Klasean landutako tresnei dagokienez, bloga izan da orain artean (IGZ ikastaroa hasi aurretik) erabili dugun bakarra. Ondorioz, erabilterrazagoa izan da eta orokorrean uste dugu erabilpen gehien izan dezakeena dela. Norberaren lanak zintzilikatzeaz gain, gainontzeko ikaskideekin hartu-emana izateko aukera ematen baitu. Interneten igorle izateko aukera ematen du finean, eta hori oso motibagarria izan daiteke nerabeentzat (beren lanak interneten ikusi ahal izatea, adibidez).

Slideshare eta wikiak, ordea, orain arte ezezagunak ziren guretzat. Halere, erabilgarritasun handia ikusten diegu bi tresna horiei. Slidesharea, alde batetik, tresna egokia da hainbat dokumentu mota (power pointak, adibidez) internetera igo ahal izateko eta esaterako, blog batean zintzilikatu ahal izateko. Tresna osagarria da. Wikiak, bestetik, balio handiko tresna direla iruditzen zaigu, eta nerabeentzat are gehiago. Taldeko lanak egiterakoan edota informazio jakin bat amankomunean jartzean, adibidez, wikia funtsesko bihur daiteke beraientzat: informazioa erakutsi, erabakiak hartu eta eztabaidatzeko.

Irakasgaia bereziki aberasgarria izan da guretzat hasiera-hasieran aitortu dugun moduan ez dugulako, orain arte behintzat, 2.0-arekiko feeling berezirik sentitu. Lehen hurbilketa bat izan da, oparoa; beldurra galtzeko balio izan diguna. Aurrerantzean hasitako bideari jarraituko diogunaren esperantza dugu orain.